هي دي الأجيال ولا بلاش.... بعض الناس اللي لسه متخرجه قريب
عندها مبادئ راسخة وراسمه لنفسها خطوط مستقيمة تمشي عليها ولا تحيد عنها أبدا
طبعا كلامي هنا عن البعض وليس الكل إحقاقا للحق يعني
وبما اني في شغلي بتعامل مع جزء كبير منهم فمن أهم مبادئهم اللي لاحظتها
أن كل حجه لازم تاخد وقتها ومفيش حاجة تيفع تطغى على حاجة
يعني وقت الشغل خلص تلاقي دول زي القطر منطلقين على بره بغض النظر الشغل خلص أو مخلصش
ولا يفرق معاهم إن فيه زنقة شغل وحاجات لازم تتسلم في مواعيدها ولو حد جرب أصلا يقرب من الويك إند ممكن ياخد درس في فقه الأولويات وطبعا من الردود الجاهزه علطول "عندي فاميلي بلانز" فطبعا كده تبقى غلاسة على العيله كلها ويتش إذ ميصحش إطلاقا.
طيب أنا مش ضد كده بس فيه حاجه اسمه إني اقلق على شغلي وأجي على نفسي شويه ولاسيما إن ده مش كل يوم يعني ولا كل شهر حتى.
ويوم زي امبارح كده فيه ماتش الأهلى لما ييجوا كلهم لابسيين أحمر ده أكيد ليه معني ….هو انتوا كلكوا لابسين أحمر ليه يا ولاد ….علشان رايحيين الماتش ….وطبعا دي جملة خبرية وليست استفهامية ….طيب مش عيب نشجع بلدنا… بس هل ده معناه إن الساعة 3 محدش يبقى موجود على مكتبة ؟؟؟
طبعا هما مش قالوا رايحيين الماتش لازم تبقى مفهمومة يعني مع إن الماتش كان هيبدأ الساعة 9 بس عادي بقى الزحمة وبتاع.
ولا يوم ما يبقى مفيش ضغط شغل واقولهم يلا بقى نتعلم حاجة جديدة كأني بالضبط قلت العبواااا انتشروااااااا جرس الفسحة ضرب يا ولاد .
زي برده لما يقابلهم مشكلة في الشغل …خلاص كده الشغل وقف لغاية ما صاحب المشكلة يحلها وده مشروط بانهم يدورا على صاحب المشكلة مرة واحده مش موجود يبقى دي مشكلته هيروحوا بقى يتفسحوا مش هيفضلوا يعني مكتومين على مكاتبهم يعني لغاية سيادته ما يشرف …..والشئ المذهل بقى إن المشكلة دي اللي ممكن تقعدهم ساعتين بيلعبوا في الآخر تبقى عباره عن ايه ….إن واحد يعمل ريستارت لسيرفر يعني يدوب يدوس على زرار. يا أعصابيييييييييييييي
مفيش عندهم حاجة اسمها الجيش قالك اتصرف ولا كلنا ايد واحدة يا بهجت …. بهجت ليه اديه وهما ليهم اديهم ...ربنا يخليهالهم
طيب الأجيال دي امتى هتتحمل المسئولية …. ولو متعبوش دلوقتي هيتعبوا امتى … وامتى هيتعلموا الإتقان في الشغل وازاي هيبقوا مديرين ..وهل المشكله فيهم ولا هما اتعودوا إن كل حاجة يتطلبوها تبقى موجدة وفيه حد لازم بيحللهم مشاكلهم علطول …ويا ترى دول هيبقوا أحسن من غيرهم واللي هيجي بعدهم هيبقى أسوأ؟؟
ربنا يهديهم ويصلح الحال لينا وليهم ….طبعا فيه ناس بتتحسن بالتوجيه وفيه ناس تانية كل ما أشوفهم تلح عليا ذكري مذبحة القلعة بتاع المماليك!!!!
والله المستعان
9 comments:
لا حول ولا قوة الا بالله يا Just
ربنا يصلح الحال يا رب
ادعي انت بس و متعمميش قولي عن عينة من زمايلك بس
لأن أنا و كل شلتي و دفعتي خريجين 2004 والحمدلله انا في امريكا و هما في السعودية وفي مصر و الامارات و كل مكان و احنا كتير جدا بنمثل أغلب دفعتنا كلنا بنروح متأخر أوي وفي منا بيباتو في الشغل في كل الأوقات حتى في الويك اند زيي مثلا
ربنا كريم
ادعيلهم ووجهلي ليهم النصح بصفتك أكبر سنا وأكثر خبرة
تحياتي لك من مانساس البلد وجزاك الله خيرا
:))))
The Groom
آآخ هي جت فيك يا فندم معلش مكنش قصدي :) بس غالبا عشان محدش بيقرأ البوستز غيرك :) ربنا يكرمك
طيب أولا أنا قلت اني بتكلم على البعض وليس الكل.
ثانيا انت ما شاء الله عليك لا يمكن تكون منهم ربنا يكرمك
وبجد هم فعلا فيهم ناس كويسه كتير بس للأسف الصفات اللي اتكلمت عليها ظاهرة منتشرة جدا في ناس كتير برده ربنا يهديهم. أنا الحمد لله ربنا بيديني الصبر على النصح بس يارب يبعد عني الضغط والسكر:)
وثالثا بقى ما تدلني على اصحابك دول يشتغلوا معانا :))
جزاك الله خيرا وربنا يهدي الجميع إن شاء الله
The Groom
:)
جزاك الله خيرا بجد على اهتمامك بالموضوع
ربنا يباركلك انت وأصحابك في شغلكم وحياتكم وربنا يوفقكوا لكل ما يحب ويرضى.
أنا عدلت كلام البوست خلاص علشان محدش يزعل ....هو كان فعلا offensive.
أولا أحب اعلق على رغبتك في أن يتنازل الناس شوية ويقفوا وقفة رجالة وقت زنقة الشغل فنصيحيت وتجربتي إن هذا الأمر لا ينضبط ولو زدتي نص ساعة بعد شوية حيبقوا ساعة حتى تصلي أحيانا إلى 21 ساعة عمل مثل ما حدث لي وبعدين توقفت ونظمت نفسي نعم لو كان فيه ظروفاستثنائية ويكون معروف انها استثنائية ماشي لكن ما تبقاش قاعدة
ثانيا بخصوص موضوع الاتقان وسبب مشكلة الأجيال دي لي بوستين معلهش وحاتقل عليكي تقريهم ومستني تعليقك
أثر الملخصات
حب الإتقان
الموضوع كله بيتلخص في كلمتين
إتقان العمل
عصفور المدينة
شكرا على التعليق.
اتفق معك تماما في موضوع السهر في الشغل وبما اني عانيت منه أيضا واكتشفت في اللآخر إن الشغل خد من وقتي وعمري أكثر من اللازم فأنا مش عايزة حد فيهم يغلط نفس الغلطة وبشجعهم على كده أصلا بس فيه أوقات فعلا استثنائية وفي متناول اديهم تحقيقها.
لقد قرأت البوستين وسعدت بالقراءة وأرجو ان تكون تعليقاتي مفيده.
Shermen
عندك حق تماما وأضيف أيضا تعليق سأقتبسه من مدونه عصفور المدينة
"خلاصة المشاكل افتقاد روح العمق والتطوير والجدية والتفاعل في مجال الأعمال".
شكرا على التعليق.
شرفتينا ونورتينا وأثبتينا
وجزاك الله خيرا على التواصل
قرات تعليقاتك وسعدت بالأجر وشرف الزيارة منك
عصفور المدينة
جزانا وإياكم إن شاء الله.
أنا التي أسعد وأستفيد حقا بكتاباتك وتعليقاتك.
Post a Comment