Friday, 17 August 2007

اللهم بلغنا رمضان

كل عام وانتم بخير …بارك الله لنا في شعبان وبلغنا رمضان
رمضان قرب يا جماعة ….يا ترى احنا مستعديين ليه؟؟
أنا واحده من الناس اللي أحيانا بخرج من رمضان وأقول ياه أنا مكنتش مركزه اوي في الطاعة والعبادات أو أقول لأ رمضان اللي قبله أنا كنت أحسن كتير وبجد لما بوصل للمرحله دي بتضايق جدا.
وبحس إني لو كنت استعديت كويس مكنش ده حصل …طبعا كله فتح وتوفيق من عند ربنا بس ربنا ادانا عقل نفكر بردو …اشمعنا يعني لما بيجيلنا مشروع جديد في الشغل بنقعد نخطط ونفكر ونظبط عشان مفيش حاجه تقع مننا …يلا نعتبر رمضان مشروع بردو لازم نخطط له كويس….
اول حاجة محتاجيين نستعين بربنا وندعيه إن رمضان ده يكوم أحسن من اللي قبله ….ولازم يا جماعة يكون فيه حاجة جديدة نزودها في رمضان اللي جاي. طاعة جديده أو عمل جديد من أجل الإسلام .
لازم نستعد من دلوقتي للتعب في رمضان ونسخن لزياده العبادات لأننا كلنا أكيد عايزين العتق من النار …ممكن يكون فيه حاجات كتير وقعت مننا بس لازم نرجعها تاني السنن….الخشوع…الذكر…القيام….المواظبه على قراءة القرآن…الصيام
محتاجين نرجع الحاجات دي من دلوقتي بدل ما نخش رمضان وبعدين نتعب من كثرة اللي المفروض نعمله..محتاجين نقف وقفه مع نفسنا من دلوقتي.
جماعة أصحابي عملوا فكره ظريفه حبيت أقولكم عليها …اتفقوا إن كل يوم من أول شعبان هبيعتوا لبعض ميل بحاجه جديده تتعمل كل يوم …يعني مثلا انهارده فيه استغفار 100 مرة …بكره فيه قراءة جزء قرآن …وهكذا
فكره عمليه وإن شاء الله تخلينا نقرب من ربنا أكتر وتزكي نفوسنا إن شاء الله بالذات لو كل واحد فينا عمل كده مع مجموعه من الناس/الأصدقاء

أطلت عليكم ....ربنا يكرمكم ويلا ندعي لبعض بظهر الغيب ربنا يبلغنا رمضان ويلهم نفوسنا تقواها.

11 comments:

عصفور المدينة said...

يا أختي طولي مش مشكلة على قدر غيابك بارك الله فيك وعودا طيبا على طاعة الله وكل عام وأنت بخير

أحمد عيسي said...

اولا حمد الله علي سلامتك
وكل سنة وانتي طيبة
وفكرة حلوة حكاية التسخين دي
بس اهم من التسخين النية الاكيدة ان فعلا رمضان ميعديش زيه زي اي شهر
لانه مش زي اي شهر
وانا معاكي شوفي حتعملي ايه وانشريه واهو نسخن مع بعض
يلا سلام

Bride Zone said...

الحمدلله على السلامة يا جست يا حبيبتي..
نور البلوق برجوعك :)
فكرة صحابك دي هايلة جداً..
يارب يبلغنا رمضان واحنا موفيين قدره يارب.. ويكون رمضان السنة افضل من رمضان العام اللي فات..

وعلى فكرة.. الناس اللي بتلبس جديد في العيد (زينا) ممكن تروح السوق وتشتري الحاجات من بدري عشان ما يروحش رمضان كلو وهمه بيدوروا حاجات للعيد! انا من يوم ما بدات اعمل كده لقيت نفسي بيكون معايا وقت اكتر ومش بفكر في حلبس ايه وحجيب ايه ومنين :)

جزاك الله خير يا جست وفي ميزان حسناتك باذن الله..

Meekness !!! said...

السلام عليكم
تصدقي بجد رمضان واحشنا قوي
اهم حاجه اننا نعرف بجد نعيش اليومين دول
نعيشهم في طاعه ربنا
ربنا يوفقك يا جميل
جميل قوي البوست
نوريني
زيزي

Just a Reader said...

عصفور المدينة
وبارك الله فيك أيضا وأعز بك الإسلام والتدوين...جزاك الله خيرا
====================
أحمد عيسى
الله يسلمك ...جزاك الله خيرا...فعلا النيه مهمة جدا ربنا يرزقنا الإخلاص...الفكرة دي انت ممكن تعملها مع أصحابك في الشغل أو البيت ..تتفقوا كل يوم على حاجة معينة تتعمل عن طريق ميل أو تليفون ..انهارده استغفار بعدد معين...بكرة لازم الصلاة تكون في مواعيدها وفي المسجد وتاخد 2 من أصحابك معاك...بعده تصحي 2 من أصحابك على الفجر ...وأكيد لو فكرت هتطلع أفكار أحسن من كده بكتير ..واهو تسخين وكله في ميزان حسناتك إن شاء الله.
==============
Bride zone
ازيك يا برايد يا جميله ...ده نورك يافندم :) حلوة فكرة إننا نجيب كل حاجة قبل رمضان عشان نتفرغ ليه :) فعلا هو وقته أثمن من أن نضيعه في أي شئ غير الطاعة...ومش هلاقي أحسن من دعوتك ...يارب يبلغنا رمضان واحنا موفيين قدره يارب :)
===================
Meekness
نورتيني يزيارتك ...يا رب نعيشهم في طاعة ويلا ابدأي سخني ...رمضان على الأبواب ...ربنا يبلغنا إياه ويوفقنا جميعا إن شاء الله :)

bos bos said...

اللهم بلغنا رمضان
جزاكى الله كل خير
تحياتى لكى

حسام مراد said...

رمضان
بجد لازم نقرب اوى من ربنا فى الشهر ده واللى بعده ويكون ده فاتحه للى جاى يا رب
ونسخن برده ليه ونستعد
واللهم بلغنا رمضان واعنا فيه على الصيام والقيام والقران
وكل سنه وانتى طيبه
تقبلى ارق تحياتى وسلاماتى
وجزاكى الله خير

A L A B D E L R H M A N . said...

كل سنة وانتى طيبة

يارب يستجيب الدعوات
ولكي بالمثل يارب



العَبدِالرَحَمن

عصفور المدينة said...

كل عام وأنت بخير وطاعة

Noony said...

جاست...كل سنة وانتي بصحة وسلامة وسعادة وكل حاجة كويسة تتمنيها تتحقق إن شاء الله
وحشتيني كتير
أنا أسفة إنش اتأخرت في الرد بس أنا الزهايمر أكل نافوخي الحمد لله وافتكرت اني رديت عليكي
(مش عارفة هبطل الداء دة امتى)
ربنا يقدرنا على فعل خير كتير في رمضان

متنسانيش من دعائك..وإن شاء الله اعديلك بظهر الغيب
وابقى طمنيني عليكي
اخبار رقبتك ايه؟
ابقى ابعتيلي ميل تطمنيني فيه عليكي...ميلي في البروفايل بتاعي

في أمان الله وحفظه
نهاد

Just a Reader said...

bos bos
رمضان جه أهو :) ربنا يعينك ...جزانا وإياكم إن شاء الله
==============
حسام مراد
آمين يا رب ....ربنا يبارك فيك ويكرمك
وكل سنة وانت طيب
===============
ِalabdelrhman
وانت طيب ...ربنا يستجب دعائنا جميعا إن شاء الله
==============
عصفور المدينه
وكل عام وأنت إلى الله أقرب وعلى طعاته أدوم
=============
noony
سلامتك من الزهايمر يا بنوته ...أنا كويسه الحمد لله ورقبتي أحسن كتير ...ربنا يعينك في رمضان على ذكره وشكره وحسن عبادته....وأكيد أكيد هدعيلك إن شاء الله :)