Time management

حياتي عايزه تنظيم وقت ....عايزه أعمل حاجات كتير ....

يارب قدرني وخر لي واختر لي :)

Count your blessings

مش عارفه ايه اللي فكرني تاني ب البلوج والكتابه وتفقد أحوال من كنت أتابعم سابقا ووجدتني أتمنى لهم كل خير:)
وفجأة حسيت بحماس للكتابة لما لقتنى باقرأ بوستس قديمة فكرتني بذكريات كتير
وأنا من فترة مسيطر عليه "وإن تعدوا نعمة الله لا تحصوها"وعايزة أكتب لنفسي كل يوم نعمة للذكرى والاعتبار بعد كده إن شاء الله
نعمة اليوم:
امبارح عملت حاجة مش شخصيتي ومش طبيعتي أوي ويمكن كنت بغلس على نفسي كمان بس إنا كنت عايزة أعملها لأبتغي بها وجه الله ونية معينة....انهاردة لقيت نقد كبير من ناس مكنتش اتوقع منهم كده ومكنتش أتوقع إنه النقد يبقى جارح كده ....وللأمانه هما مكانوش عارفين إني ممكن أعرف رأيهم ....وفي وسط ضيقي ربنا في نفس اللحظة بعتي حد - غير مسلم - يقولي ...الحاجة دي كانت مفيدة جدا وفتحت لنا أفكار جديدة وحلوة!!
سبحان الله ربنا رحيم أوي ....اللهم لك الحمد :)

كل سنة وأنتم طيبيين

كل عام وأنتم بخير يا جماعة رمضان خلاص على الأبواب ربنا يعيده علينا بالخير واليمن والبركات

الشهر ده بقى إن شاء الله هيبقى أجازة من التدوين علشان طبعا كلنا محتاجين نركز جامد على العبادة والطاعة ويبقى شغلنا الشاغل هو الله سبحانه وتعالي فقط لا غير منشوفش غيره ونعيش الشهر ده ليه وبه لأن بجد رمضان ده فرصة كبيره وعظيمة اوي إن ربنا يعتقنا من النار بعد كل ذنوبنا دي وكمان فرصة إنه يستجيب دعائنا وكلنا لنا طلبات وأدعية

مش هطول عليكم طبعا كلكم عارفين فضل الشهر الكريم بس عايزة أنقل لكم كام نقطة من أجمل ما سمعت

أولا : الإستعانة بالله والدعاء إنه يوفقنا إننا نؤدي العبادات بإخلاص وعلى الوجه الذي يرضاه من ومنفتكرش إن أي حاجه بنعملها في الشهر ده بمجهودنا ده بفضل الله

ثانيا: رمضان شهر لازم نغتنمه وجاي لينا بعد غيبه إحدى عشر شهرا وربنا بيحبه جدا .... فآروا الله من أنفسكم خيرا

ثالثا: لازم نركز أوي الدقيقة هتعدي علينا واحنا بنعمل ايه في رمضان

رابعا : محتاجين ناخد بالنا من معاملتنا مش من العباده بس ونرد أي مظالم ونفض أي نزاع مع حد

خامسا: نسال الله أن يتقبل منا ونسأله الثبات بعد رمضان ويكون عندنا حسن ظن بالله إنه هيتقبل

سادسا: نشكر الله على نعمه وتوفيقه لينا في الشهر الكريم ده

ربنا يكرمن جميعا ويعيننا على طاعته وذكره وشكره وحسن عبادته ولا تنسوني من صالح دعائكم وهدعيلكم كلكم بظهر الغيب إن شاء الله وأشوفكم على خير بعد العيد بإذن الله :)

اللهم بلغنا رمضان

كل عام وانتم بخير …بارك الله لنا في شعبان وبلغنا رمضان
رمضان قرب يا جماعة ….يا ترى احنا مستعديين ليه؟؟
أنا واحده من الناس اللي أحيانا بخرج من رمضان وأقول ياه أنا مكنتش مركزه اوي في الطاعة والعبادات أو أقول لأ رمضان اللي قبله أنا كنت أحسن كتير وبجد لما بوصل للمرحله دي بتضايق جدا.
وبحس إني لو كنت استعديت كويس مكنش ده حصل …طبعا كله فتح وتوفيق من عند ربنا بس ربنا ادانا عقل نفكر بردو …اشمعنا يعني لما بيجيلنا مشروع جديد في الشغل بنقعد نخطط ونفكر ونظبط عشان مفيش حاجه تقع مننا …يلا نعتبر رمضان مشروع بردو لازم نخطط له كويس….
اول حاجة محتاجيين نستعين بربنا وندعيه إن رمضان ده يكوم أحسن من اللي قبله ….ولازم يا جماعة يكون فيه حاجة جديدة نزودها في رمضان اللي جاي. طاعة جديده أو عمل جديد من أجل الإسلام .
لازم نستعد من دلوقتي للتعب في رمضان ونسخن لزياده العبادات لأننا كلنا أكيد عايزين العتق من النار …ممكن يكون فيه حاجات كتير وقعت مننا بس لازم نرجعها تاني السنن….الخشوع…الذكر…القيام….المواظبه على قراءة القرآن…الصيام
محتاجين نرجع الحاجات دي من دلوقتي بدل ما نخش رمضان وبعدين نتعب من كثرة اللي المفروض نعمله..محتاجين نقف وقفه مع نفسنا من دلوقتي.
جماعة أصحابي عملوا فكره ظريفه حبيت أقولكم عليها …اتفقوا إن كل يوم من أول شعبان هبيعتوا لبعض ميل بحاجه جديده تتعمل كل يوم …يعني مثلا انهارده فيه استغفار 100 مرة …بكره فيه قراءة جزء قرآن …وهكذا
فكره عمليه وإن شاء الله تخلينا نقرب من ربنا أكتر وتزكي نفوسنا إن شاء الله بالذات لو كل واحد فينا عمل كده مع مجموعه من الناس/الأصدقاء

أطلت عليكم ....ربنا يكرمكم ويلا ندعي لبعض بظهر الغيب ربنا يبلغنا رمضان ويلهم نفوسنا تقواها.

أسألكم الدعاء

السلام عليكم .....

تحديث

أخوتي في الله ....جزاكم الله خيرا على سؤالكم ودعائكم وجعله الله في ميزان حسناتكم

الحمد لله أنا بخير ...لازلت أتابع علاجي بس الحمد لله أنا أحسن كتير ...بجد ربنا كريم أوي

...جزاكم الله خيرا مرة ثانية وخدوا بالكوا من رقبتكم ومن القعدة أمام الكمبيوتر وبجد أسوأ حاجة الإسراف في القعده أمامة....الوقاية خير من العلاج :)

ربنا يكرمكم جميعا

كيف حالكم جميعا ....عذرا إني مش قاردة اتابع حد أو أرد حتى على كومنتس البوست اللي فات فلقد

عاودتني آلام رقبتي من جديد ولكنها أشد ضراوة هذه المرة ..... طلع عندي خشونة في الفقرات وانزلاق غضروفي عنقي أدي إلى إني مش عارفة أقوم ولا أقعد ولا أنام ولا أستطيع إلا أن أشعر بألم شديد بذراعي الأيسر و أصابعي بها تنميل غريب.... الحمد لله على كل حال

خدوا بالكوا من رقبتكم وأدعوليييييييييي ربنا يكرمكم

بس خلاص .....أنا همشي بقى بدل ما أعيط قدامكوا من كتر الألم

حقا أسألكم الدعاء

أفراح

أفاقت من نومها وفتحت عيناها وهي لا تدري كم مر من الوقت وهي نائمة فقد كانت حقا متعبة ...

مرت عليها أيام مليئة بالأفراح ولكنها كانت شاقة ... كان زواج اثنين من صديقاتها التي تحبهم كثيرا

فقد أمضوا في العمل أوقاتا طويلة عاشوا فيها الفرح والحزن والضجر والجنون والبكاء والسعادة

لحظات وأيام وشهور وسنوات مرت عليهم زادتهم ترابطا وحبا وكانا بمثابة أخوتها الصغيرات

كان أسبوع زفافهم ومرت الأحداث سريعة ومتلاحقة ...اليوم تحتفل الصديقة الأولي بالحنة وغدا زفافها وبعد غد حنة الصديقة الثانية وبعدها زفافها وما بين ذلك وذاك مطتلبات ومشتريات لا تنفذ

ذهبت إلى الحنة وقلبها ملئ بالفرح فهي حقا تحبهم وتتمني لهم كل السعادة والفرح ....نظرت إلى رفيقاتها في الحنة فلم تستطع أن تشارك معهم في الغناء والمرح والصخب مثلما يحدث في تجمع البنات في مثل هذة المناسبات ....فطبيعتها هادئة إلى حد كبير وقد يكون الفارق العمري بينهم لم يساعدها على ذلك

تلفتت لتبحث عن من هم في مثل عمرها فوجدت منهم من شغلتهم بيوتهم وأزواجهم وأبنائهم عن الحضور وغير المتزوجات منهم لم يعدن يشعرن بالسعادة لحضور تلك المناسبات

قلبها كان يريد أن يشاركهم هذا الإنطلاق فلم يقدر لها ان تفرح بتلك المناسبة من قبل وعقلها يمنعها ويقول لها لم تغدي صغيرة مثلهن ويفرض عليها الوقار....

انتهت من أفراح الألف ليلة وليلة التي عاشتها لتتذكر كم شعرت أنها وحيدة .....العالم كله يتحرك من حولها وهي ثابتة في مكانها ......

أفاقت من نومها لتتساءل أين هي من كل ذلك ...

لم تجد لسؤالها جواب فعادت إلى نومها العميق من جديد

بوست صيني جدا

يقول المثل الصيني ...لا تعطتني سمكة ولكن علمني كيف اصطادها
عجبتني أوي فكرة جمعية الأورمان دي اللي كانت بتدي الأسرة بقرة تكبرها وتستفيد منها في رفع دخلها بدل ما تديهم فلوس مسيرها تتصرف وتخلص
ومتستغربوش من الفكرة بجد فيه أسر المبالغ الزهيدة دي ممكن تؤثر في رفع دخلها ....ربنا يكرمهم يوسع رزقهم ورزق الجميع

لو فكرنا بنفس المنطق هنلاقي إننا بنفتقد في بلدنا العزيز إنتاج العديد من الصناعات الصغيرة اللي شاطرة أوي فيها الصين مع إننا ممكن لو درسنا الموضوع صح الصناعات دي ممكن تبقى مصدر رزق ممكن نقول مساعد أو جانبي لبعض الأسر بالإضافة إلى على الزراعة مثلا والمنتجات الزراعية

طيب تفتكروا ايه الصناعات الصغيرة اللي نقدر نعملها في بلدنا وقي نفس الوقت تقدر توجد بعض فرص العمل لبعض الأفراد وتبقى مصدر للدخل ؟ (بس حاجة غير كشك السجاير لو سمحتوا:))

وجزاكم الله خيراا

لو علمتم الغيب

من منا لم يمر بابتلاء ...

من منا لم يطلب شيئا ظنا منه أنه الأفضل له ثم يأخذه الدهر إلى الاتجاه العكسي

مين منا مقالش ياه لو بس أعرف ايه اللي هيحصل في الموضوع ده ويا ترى أخره خير ولا

مين منا مقالش ياه ....لو أعرف بس الناس دي في دماغها ايه بالضبط

سبحان الله ....أكيد ربنا مش قصده إن احنا نتضايق و أكيد لما بندعي كتير وتتأخر الإجابة ده مش بيبقى لإن ربنا مش مهتم بينا

الفكرة كلها إن ده بيبقى هو الأحسن لينا واحنا منعرفش بس ببصيرتنا الضيقة

ولو ركزنا في كلمة " لو علمتم الغيب لاخترتم الواقع" هنلاقي إن بجد فيها إعجاز

كنت بناقش الموضوع ده مع مدرستي يوما ما وقالت لي كلمتين يستدعوا التفكير فعلا

تخيلوا لو أننا نعلم الغيب .....لو عرفنا احنا هنموت امتى .....هنفقد حد عزيز امتى ....مش هننجح في امتحان ....هنسيب الشغل امتى ....هيحصلنا الحادث الفلاني امتى

تفتكروا حد ممكن أصلا يخرج من بيته أو يروح يشتغل مادام عارف إنه هيسيب الشغل في الوقت ده ولو عارف إنه هيحصله حادث أثناء سفره ...ممكن يسافر؟ أكيد الدنيا هتختل والإنسان أكيد أكيد هينسى تماما الرسالة اللي هو أصلا مخلوق من أجلها وممكن ينتابه كمية من القلق والضغط العصبي اللي يجعل حياتة كلها جحيم

طيب كل الأحداث دي أحداث كئيبة ...تعالوا نبص للموضوع من الجانب الآخر ....الأحداث السعيدة

لو الواحد عرف إنه هيشتغل في الشركة الفلانية أو هيتجوز فلان أوحتى إنه داخل الجنة تفتكروا ممكن في يوم من الأيام يتعب ويأخذ بالأسباب ويدعو ربه....اكيد هيتواكل وبرضو هينسى تماما الرسالة اللي خلق من أجلها والأنسان أصلا ما بيصدق يشعر بالإطمئنان حتي يسترخي ويقصر في العبادة والدعاء ....ربنا يعافينا

وتخيلوا لو أننا علمنا الغيب على المستوى الشخصي في تعاملاتنا ....يعني كل واحد كده يبقى فكره شفاف بالنسبة للآخر وكل تصرفاته وتفكيره مكشوف بالنسبة للشخص اللي أمامة ....أعتقد إن هيبقى مفيش داعي للتحاور أصلا مدام كل واحد قادر يقرأ فكر التاني.... سبحان الله أكيد كانت هتبقى حياة غريبة لو عرفت اللي قدامك بيفكر فيك بطريقة كويسة ولا وحشة

سبحان الله الحكيم العليم القدير الذي تواضع لعظمته كل شي।

ربنا يلهمنا الفهم والثقة و الصبر والتوكل على الله

ولما تضيق بينا الحياة ومنفهمش اللي بيحصل ده ليه نتأكد إنه أكيد خير لينا وندعيه ولو إجابة الدعاء طالت نتأكد إنها هتستجاب في الوقت المناسب ولما تستجاب نشكر ربنا ومننساش إن دي في يوم من الأيام كانت دعوة احنا طلبناها

الأسبوع في سطور

أسبوع كان حافل بالأحداث بس يا ترى الأحداث كانت حافله فعلا؟

- رحت اسكندرية اللي أنا بحبها!
- رحلة كانت ظريفة بس السفر جه فجأة وأنا شخصية بحب آدي البلانينج حقه مش بعرف أتاخد على خوانه كده
- سافرت أنا وأختي وطفليها وخالتي على وعد من باقي العائلة إنهم يحصلونا بس للأسف مقدروش :(
- كان نفسي تبقى سفرية استجمام بس تحولت إلى مسئولية وقلق وحسيت إني كنت رجل البيت!!
حقيقي سبحان الله الرجل رجل والست ست ومينفعش حد فيهم ياخد دور التاني وفي رأيي تو ماتش إن ديبندنس على قد ما هو نعمة على قد ما هو مش حلو خالص.
- قعدت قدام البحر الحمد لله بس مش كتير علشان الأطفال فرضوا علينا البسين!!
- صورت البحر كتير ويعدين الكاميرا عملت بأصلها وباظت للأسف :(
- رجعت عندي تلال من الشغل - أصلا كنت واخده أجازة يوم واحد وخليتهم يومين بس بجد طلعت علية الأجازة بط بط.
- لسة عندي آلام في رقبتي بسبب الكمبيوتر العظيم ولسه مش قادرة أصدق الدكتور اللي مفهمنييش أي حاجة ولا حتى قالي مواعيد الدواء وكان بيكلمني وهو مستعجل جدا عشان عنده زحمة! ومش قادرة أنسى خطة الوحش اللي حتى الدكتور الصيدلي مقدرش يفهمه واداني دوا غلط!! بس ربنا ستر إني قريت الروشته قبل ما أخده ولقيت إنه دوا حساسية وحروق شمس وملوش علاقة بالرقبة!!
زعلانه منكم جدا يا دكاتره!!
- وأنا في الشغل ولا بيه ولا عليه لقيت حد كان معايا زمان بيكلمني على شركة كبيرة مش هقدر أنكر عايزه ناش تشتغل فيها وهو شايف إني مناسبة....ممممم أنا مش مضايقة خالص من شغلى ومكنتش بفكر أسيبه أصلا بس بصراحة الشركة التانية ممكن تكون فرصة حلوة ...الفكرة إني أنا خضت التجربة دي السنة اللي فاتت وانتهت إني قعدت في شركتي لأني بحبها فعلا مع إني كنت بجد وصلت إلى قمة الزهق بس برده قررت استمر بعد ما شوية الحاجات اللي مضيقاني اتحلت ... مش عايزة اعمل كدة تاني بس يمكن اروح الانترفيو من باب العلم بالشئ والواحد يشوف الدنيا بره عامله ازاي.

-رجعت لاقيت فاتني بوستس كتيييير ولسه لغاية دلوقتي مكملتش قراءة!
بس خلاص !!

أول تاج

التاج ده من شيرمين الجميله.....وأدي الإجابات يا شيري معلش اتأخرت عليكي

أحب شخص لقلبك فى الدنيا؟
بابا ...ربنا يبارك لي في عمره
انسان مستعد تضحي بحياتك – ركز فى كلمة حياتك - عشانه؟
بابا تاني...ربنا يرزقني بره ويعينني عليه
انسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟
يااااااااا .... عمري ما فكرت كده أصلا ... وبالعكس أنا عن نفسي بعد ما بفكر شويه بلاقي إن كل إنسان ضايقني أو ظلمني في الآخر يا بيبقى ربنا بيجعله سبب في تغيري للأفضل يا إما بصبر عليه ويعلمني كظم الغيظ ويديني ثواب ويحسن الكومينيكشن سكيلز بتاعتي :)
ما هو:اسم أجمل كتاب كتبه بشر قرأته ومحتفظ به حتى الان؟
لا تحزن - عائض القرني
اسم كتاب -كتبه بشر برضة- انت متعلق بيه وبتقرأه كل فترة؟
كتب تفسير القرآن عموما
اهم جهاز منزلى انت متعلق بيه او بتستخدمه كتير؟
الثلاجة طبعا :)
مكان تحس بالراحة عندما تدخله؟
مسجدي المفضل
شىء تحس بالراحة النفسية عندما تنظر اليه؟
البحر - السماء - الصحراء - الخضرة
مكان تحس فيه بالحنين الى شىء لا تدرى ماهو و ذكريات جارفة الى لاشىء؟
بلدتنا الريفية
اجمل مدينة زرتها داخل مصر؟
الاسكندرية
أجمل مكان طبيعي رأيته داخل مصر؟
أي مكان به بحر أو جبل أو خضرة أو صحراء
شخصية كارتونية بتحبها؟
بارنييييي :)
نوع هاتفك المحمول؟
نوكيا
سرعة بروسيسور جهازك؟
اللي في البيت ولا اللي في الشغل :)
حجم ذاكرة –هارد- جهازك؟
حبة حلوين
المساحة التى تشغلها المواد الاسلامية على جهازك؟
أغلبها برزنتيشنز وميلز ...علشان مش بعرف أسمع حاجه وأنا بشتغل وفي البيت بفضل أقرأ كتب أو أسمع شرايط كاسيت।

نفس المساحة السالف ذكرها فى قلبك -الاجابة لنفسك عشان الرياء يا اخواننا -؟
ما شاء الله ..السؤال أهو مجاوب نفسه
أهم هدف انت واضعه لحياتك الآن؟
نفسي أحفظ القرآن

عندي امتحان قريب ...نفسي أنجح فيه...دعواتكممم

مواصفات فتى الأحلام بالنسبة لك؟
ذو دين وخلق بكل ما تحمله الكلمتين ممن معاني وبشرط انهم يكونوا مقترنين

نفسي نكون زياده لبعض في كل طاعة تدخلنا الجنة

صف ما يأتى:شعورك لما بتسمع كلمة مصر؟
أشعر بالحب
شعورك لما بتسمع كلام عن اليهود؟
بقول حسبي الله ونعم الوكيل
شعورك لما بتشوف ظابط شرطة؟
ولا حاجه ...كله في السليم الحمد لله :)
شعورك لما بتشوف الكناس العجوز فى الطريق؟
تلح علي رغبة بالبكاء وأقول سبحان الله ربنا خلقنا درجات علشان نكمل بعض وبحمد ربنا على نعمه اللي ساعات كتير مش بنفتكرها ونركز بس في اللي ناقصنا
افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟
بتمني أنه يكون فاهم دينه صح وزي ما هو متمسك بيه في مظهره يكون متمسك بيه في باطنه
احساس يراودك فى اشارة مرور مغلقة بسبب مسئول كبير؟
بتضايق لو كان عندي معاد مهم وهتأخر عليه
أكثر من قول لا حول ولا قوة إلا بالله لعل الإشاره تنفرج

تم بحمد الله :)

فزورة

كنت بحضر كورس بيتكلم عن التفكير الابداعي وكان فيه جمله حيرتني شوية بس لما فهمت عجبتني جدا

You think that because you understand one, you understand two, because one and one make two, but you must understand "and" too.


Any creative ideas?

Barney:)

لازم نعترف اننا مهما كبرنا واتخرجنا واشتغلنا فلسه عايش جوانا طفل صغير. الطفل ده هو اللي خلاني مرة اتابع برنامج كرتوني اسمه بارني بس حقيقي كان هادف جدا.
الحلقة كان اسمها "it is nice just to be me"
وكان بارني بيحكي إن كان فيه مرة فلاح عنده حيوانات كتيرة كلها
بتحبة جدا بالذات الحمار بتاعة.
الفلاح كان دايما بيلعب ويضحك مع الحيوانات بتاعته وعلى آخر اليوم كان كل واحد بيبات في المكان المخصص ليه وكان الحمار بيبات بره على باب البيت ومكنش مبسوط من كده علشان كان بيبص علي الفلاح من الشباك بيلاقية بيلعب مع الحيوانات الي جوه البيت وبالذات القطة اللي بتجري في كل حته وبتطارد الفيران وتنط من فوق الترابيزات وكان الحمار بيلاحظ إن الفلاح مبسوط من القطة وبتضحكه جامد.
وبما إن الحمار كان بيحب الفلاح جدا فقرر إنه يعمل حاجة علشان يضحك صاحبة ويقرب منه ويخليه يبات معاه جوه البيت فقرر إنه يقلد القطة وراح دخل البيت وقعد ينط فوق الترابيزات والكراسي زي القطة فاكر إنه كده بيبسط الفلاح لكنه في الحقيقة نظرا لحجمة دمر البيت وقلبه رأسا على عقب فالفلاح زعل منه وفهمة في الآخر إن كل واحد مختلف عن التاني ولازم يعيش شخصيته ويبقى فخور بيها.
وفي الآخر راح قاله كلمات الأغنية دي

No one else is just like as I am
No one else is just like me
I was born very special
And I am special now
And it is just nice to be me
See me eyes nose & hair are special
Just because they are mine

قد ايه ساعات بننسى المعنى ده وقد ايه بنتوه وسط الضغوط ونفقد أحيانا ثقتنا بنفسنا ومبنحسش إننا مميزيين عن غيرنا وإن ربنا أصلا خلقنا مختلفين علشان نكمل بعض. محدش المفروض يقلل من طريقة تفكير أي حد لإن دي أول طريقة بتقتل التفكير الإبداعي لدي الإنسان.
الإنسان في الآخر له رساله وهدف في الأرض لازم يحققه من خلال الاستعانه بالله وإيمانه بنفسه وقدراته لإن عمرة بيتقاس بمقدار تأثيره في الآخرين وكما قال مصطفي الرافعي : إذا لم تزد شيئا في الحياة فأنت زائد على الحياة.
حقيقي الحلقه آثرت فيا :) وربنا يوفقنا جميعا لما يحب ويرضي.

من كل بلد نفس اللقطة

أعشق البحر وأعشق الجلوس أمامة بالساعات ولا أمل ...أحتسب الجلوس أمامة بعبادة التفكر في خلق الله وكلما رأيته أجدني أقول "ربنا ما خلقت هذا باطلا سبحانك فقنا عذاب النار"
كلما أذهب إلى مكان به بحر لابد أن التقط له صور ربما أكثر من أي شئ أو شخص آخر.

Speachless

How strange that we should ordinarily feel compelled to hide our wounds when we are all wounded!

سؤال

ليه الواحد بيبقى رايح يعمل حاجه خير وناوي بيها أنه يساعد حد في أزمه لعل الله يفرج عنه أزمته
يلاقي الناس دي بتضايقه (يمكن من غير ما يشعروا) ويقابل ناس تانية تيجي على الجرح وتفكره بأزمته اللي مضايقاه ولا حيلة له فيها …. ويلاقي في الآخر نفسه مهموم من كل اللي حصل
ايه الحكمه من أنه يبغي عمل خير ويرجع مضايق ومجروح
أكيد الحكمه مش أنه يعتزل الناس ويبطل يساعدهم … مش ده اللى ربنا عايزة طبعا
اعترف أنه ممكن يكون ابتلاء فبيصبر ويحتسب وليه جزاءه في الآخره ….. أكيد آه …بس تكراره مش مفهوم
يمكن ربنا بيجعل الناس دي سبب للضيق علشان يلجأ لربنا أكتر ويدعيه يفرج أزمته … يمكن بس ده بيحصل أصلا
فيه رسالة ربانية وحكمة أنا مش قادرة أوصلها … لو حد عارفها يقولي …. ده لو أنا أصلا بقول كلام مفهوم !!

أجيال عظيمة

هي دي الأجيال ولا بلاش.... بعض الناس اللي لسه متخرجه قريب
عندها مبادئ راسخة وراسمه لنفسها خطوط مستقيمة تمشي عليها ولا تحيد عنها أبدا
طبعا كلامي هنا عن البعض وليس الكل إحقاقا للحق يعني
وبما اني في شغلي بتعامل مع جزء كبير منهم فمن أهم مبادئهم اللي لاحظتها
أن كل حجه لازم تاخد وقتها ومفيش حاجة تيفع تطغى على حاجة
يعني وقت الشغل خلص تلاقي دول زي القطر منطلقين على بره بغض النظر الشغل خلص أو مخلصش
ولا يفرق معاهم إن فيه زنقة شغل وحاجات لازم تتسلم في مواعيدها ولو حد جرب أصلا يقرب من الويك إند ممكن ياخد درس في فقه الأولويات وطبعا من الردود الجاهزه علطول "عندي فاميلي بلانز" فطبعا كده تبقى غلاسة على العيله كلها ويتش إذ ميصحش إطلاقا.
طيب أنا مش ضد كده بس فيه حاجه اسمه إني اقلق على شغلي وأجي على نفسي شويه ولاسيما إن ده مش كل يوم يعني ولا كل شهر حتى.
ويوم زي امبارح كده فيه ماتش الأهلى لما ييجوا كلهم لابسيين أحمر ده أكيد ليه معني ….هو انتوا كلكوا لابسين أحمر ليه يا ولاد ….علشان رايحيين الماتش ….وطبعا دي جملة خبرية وليست استفهامية ….طيب مش عيب نشجع بلدنا… بس هل ده معناه إن الساعة 3 محدش يبقى موجود على مكتبة ؟؟؟
طبعا هما مش قالوا رايحيين الماتش لازم تبقى مفهمومة يعني مع إن الماتش كان هيبدأ الساعة 9 بس عادي بقى الزحمة وبتاع.
ولا يوم ما يبقى مفيش ضغط شغل واقولهم يلا بقى نتعلم حاجة جديدة كأني بالضبط قلت العبواااا انتشروااااااا جرس الفسحة ضرب يا ولاد .
زي برده لما يقابلهم مشكلة في الشغل …خلاص كده الشغل وقف لغاية ما صاحب المشكلة يحلها وده مشروط بانهم يدورا على صاحب المشكلة مرة واحده مش موجود يبقى دي مشكلته هيروحوا بقى يتفسحوا مش هيفضلوا يعني مكتومين على مكاتبهم يعني لغاية سيادته ما يشرف …..والشئ المذهل بقى إن المشكلة دي اللي ممكن تقعدهم ساعتين بيلعبوا في الآخر تبقى عباره عن ايه ….إن واحد يعمل ريستارت لسيرفر يعني يدوب يدوس على زرار. يا أعصابيييييييييييييي
مفيش عندهم حاجة اسمها الجيش قالك اتصرف ولا كلنا ايد واحدة يا بهجت …. بهجت ليه اديه وهما ليهم اديهم ...ربنا يخليهالهم

طيب الأجيال دي امتى هتتحمل المسئولية …. ولو متعبوش دلوقتي هيتعبوا امتى … وامتى هيتعلموا الإتقان في الشغل وازاي هيبقوا مديرين ..وهل المشكله فيهم ولا هما اتعودوا إن كل حاجة يتطلبوها تبقى موجدة وفيه حد لازم بيحللهم مشاكلهم علطول …ويا ترى دول هيبقوا أحسن من غيرهم واللي هيجي بعدهم هيبقى أسوأ؟؟

ربنا يهديهم ويصلح الحال لينا وليهم ….طبعا فيه ناس بتتحسن بالتوجيه وفيه ناس تانية كل ما أشوفهم تلح عليا ذكري مذبحة القلعة بتاع المماليك!!!!
والله المستعان

بحبك يا ربي قلبي شدا

Law of attraction

توصل الغرب إلى الحل السحري لجميع المشاكل وأطلقوا عليه هذا اللقب ….يظن بعضهم أنه درب من الخيال أو السحر فمنهم الموافق ومنهم المعارض ومنهم من يسئل أسئله ولا يملك لها إجابات ويكاد أن يسبب لهم لوسة عقلية .
ما قصة هذا اللغز الذي أعتقد أننا بفضل الله نملك مفاتحه
سأقتبس بعض الجمل من مقالة موجودة على النت لأشرح مفهوم هذا القانون ثم أعلق عليه في مجرد كلمتين

========================================================================
The Law of Attraction - in its simplest form - states that like attracts like.

We all think about being healthy, rich, and having fulfilling lives, if we properly focused on those things that they would come to us in abundance, the truth is that most people don't focus on having those things - they focus on the fact that they DON'T have those things!
If all you ever do is think about how much you wish you were healthy, rich, etc ….all what you will get is life full of wishing you had all of those things.

In order to invoke the Law of Attraction for positive gain, you must visualize the things that you want, feel in your heart what it will be like to have them, and believe that you will get them. It really is just that simple!

Now, don't misunderstand. The Law of Attraction is not "magic". You won't manifest material goods or personal success simply by thinking about them. However, the Universe WILL provide methods for you to gain those things, and hard work may or may not be part of that equation.


==============================================================================
طيب سبحان الله الناس دي ليه محتاره كده ألا يظن كل منا أن الموضوع مش غريب عليه …..
أليس هذا هو حسن الظن بالله
أليس هذا هو اليقين الذي هو شرط إجابة الدعاء
سبحان الله كل ما علينا هو الدعاء والطلب والثقة في أن الله بقدرته قادر على تحقيق هذا الدعاء بالضبط كما يقول قانونهم !!

"فذلكم الله ربكم الحق فماذا بعد الحق الا الضلال فانى تصرفون "
اللهم الحمد لله على نعمة اللإسلام …الدين الحق

اللهم ارزقنا الدعاء واليقين وإجابة الدعاء .

النية

النية دي أهم حاجة في أي عمل …هي أساسة وهي بدايته وهي كمان اللي بتضمن نهايته.
و قد علمنا الرسول صلى الله علية وسلم "إنما الأعمال بالنيات ولكل امرىء ما نوى".
وقد اعتدت بفضل الله على أن آخد نيه في بداية كل عمل. الموضوع ده مكنش سهل في الأول بس طبعا ده بفضل الله وبمعاونة بعض الإخوة في الله وبسماع بعض الدروس عن موضوع النية قدرت اركز فيه.
كنت في الأول بكتب ورقة كده مكتوب عليها كلمة "النية" وأضعها أمامي في مكان واضح لغاية ما بدأت تثبت الحمد لله. بس طبعا أنا إلى الآن ممكن أنسى إني آخذ نية قبل بداية بعض الأعمال بس الحمد لله بفتكر مثلا في نصفها واستحضر لها نية وادعو ربنا يتقبل .

انهارده بقى سبحان الله خطر في بالي شيء غريب…. إذ بي أفاجأ إني أنا نسيت آخد نية للبلوج ده !!

وبعد المفاجأة جالي صدمة تانية…لأني حتى لما كنت بنسى أخد نية في بداية العمل وبفتكر في النص كان علطول ربنا بيلهمني النية أما انهارده وبعد ما اكتشفت الإكتشاف ده معرفتش حتى أرد على نفسي وقعدت أفكر كتييير.
طيب ف ايه
طيب ف أنا عملت بلوج عشان أفضفض عن أفكاري ….علشان برده المسلم مطالب إنه يبقى مثقف ومطلع على جميع أفكار الحضارات المسلمة والغير مسلمة و اهيه تبقى دعوة للتعايش….علشان كمان ممكن يكون عندي شوية وقت فراغ بستخدمه في اللإطلاع والقراءة. طيب كل ده كويس بس حسيت إن مش دي النية اللي اعتدت عليها.
طيب ف ايه بردو
طيب فبما إني في البوست اللي فات كنت قايلة إن الحياة اختياريين إما (ve+) وإما (-ve)
قررت أنفذ اللي أنا بكتبه وقلت هبقى إيجابية وهسئل نفسي تاني ايه النية من ورا البلوج ده وايه يا ترى نية كل المدونيين دول
فكان ذلك الحوار مع نفسي قلت ممكن تكون النية:
- الأمر بالمعروف والنهي عن المنكر؟ ….مممم طيب إزاي …ما هو أنا ممكن أكتب بوست يحث على كدة وممكن أرد على بوست وكلامي يؤثر في كاتبه وينهاه عن أي منكر أو يأمره بالمعروف ما هو للمسلم على المسلم حق النصيحة……مممم جايز
- تفريج كرب مسلم ….والله ممكن …ما هو مفيش حاجة اسمها صدفة ويمكن ربنا يبعتني لحد مكروب اهون عليه أمره بتذكيره بكلام الله …..مممم احتمال
- الدعاء بظهر الغيب ….ما أنا ممكن لما ألاقي حد في مشكلة ما غالبا هدعيله بظهر الغيب والملائكة تؤمن على دعائي وتقول لي "ولكي مثله" ويمكن كمان الناس تدعيلي بظهر الغيب كذلك …ما شاء الله فيه إخوه الدعاء لا يفارق تعليقاتهم. …هممم ممكن برده مش عيب
- الدعوة إلى الله ….صح برده ما أنا ممكن أجعل جزء من البوستز بتعاتي لذلك الإتجاه سواء للمسلمين أو لغير المسلمين …مممم وليه لأ
- والنية بقى اللي خطرت في بالي حالا إن ممكن حد يقرأ البوست ده ويبدأ يآخذ نية أو حتي يجددها و الدال على الخير كفاعله وتبقى في ميزان حسناتنا احنا الاثنين J

طيب أنا حسيت إني اقتنعت شوية ويارب ده ميكونش هوى نفس وأسأل الله الإخلاص والدعاء
"اللهم إني أسألك خيره وخير ما فيه وأعوذ بك من شره وشر ما فيه"
والله المستعان.

Life is all about choices.

I recieved this long time ago and I always check it from time to another, it 's like a Reminder!!

You choose how you react to situations.
You choose how people will affect your mood.
It's your choice how you live your life.
The only thing that is truly yours -- that no one can control or take from you-
is your attitude, so if you can take care of that, everything else in life becomes much easier.
Each time something bad happens, you can choose to be victim or you can choose to learn from it.
Every time someone comes complaining, you can choose to accept their complaining or you can point out the positive side of life.

Now you have two choices to make: you can choose to be in a good mood or you can choose to be in a bad mood.

Life is all about choices.